Berliner Journal
Des Berliner Journal is een hochdeitsche Woche-Zeiding geweest, ass im Yaahr 1859 zum erschte Mol fer die Ontario-Deitscherei publiziert warre is in was is heidichdaags die kanadische Schtadt Kitchener. Die Zeiding gemacht hen zuerscht zwee Deitschlenner: der Friedrich Rittinger, een politischer Flichtling, un der Johann ("John") Motz . Sie waare beed Republikaner aus Deitschland.
Schpeeder hen die beed Seeh vum Alte Rittinger un vum Alte Motz, der John A. Rittinger un der William Motz fer die Zeiding als Drucker un als "Redakteur" gschafft. Zu ihrne beschte Zeite (um 1900 rum) hot mer yede Woch mehner wie 3,700 Schtick vum "Berliner" in der Ontario-Deitscherei verkaaft. Sellmols is die Zeiding die greeste hochdeitsche Zeiding in Kanadaa gweest. Die Firma "Rittinger & Motz" hot aa annere hochdeitsche Bleeder aus der Ontario-Deitscherei uffkaaft un mit dem "Berliner" zammmeglegt.
Wege dem kanadische Griegs- un Anglo-Nationalismus hot die Dominions-Owwrichkeit im Oktower 1918 beschtimmt, ass mer keen hochdeitschi Zeiding mehr in Kanadaa hot drucke darrefe. Sellewege is des Blatt yuscht noch uff Englisch mit een neie Naame ("Ontario Journal") verkaaft warre. Im Yaahr 1924 hot mer die Zeiding fer finanzielle Grind nimmi weider drucke kenne. So, mit dem "Berliner" waar es naach 65 Yaahre verbei.
Pennsylvanisch-deitsche Kolumne im Berliner Jorunal
[Ennere | Quelltext bearbeiten]Weil des Pennsylvanisch-Deitsch die Mudderschprooch fer schiergar alle deitsche Eiwuhner in dem Schproocheiland waar - aa fer die Kinner vun schpeedere Siedler aus Deitschland - hot mer im Berliner allweil pennsylvanisch-deitsche Kolumne ghatt - zum Beischpiel die schpassiche "Brief" vum "Joe Klotzkopp", odder vun sei Fraa der "Särah Klotzkopf". Die erschte pensylvanisch-deitsche Kolumne is gedruckt warre in der hochdeitsche Zeiding Ontario-Glocke am 22. Yenner 1890. Die Brief warrre deel gschriwwe vum John A. Rittinger un sellewege Deel vun een eegne, originale pennsylvanisch-deitsche Literatur-Produktion in der Ontario-Deitscherei. Annere pennsylvanisch-deitsche Brief un Kolumne hot mer aus deitsche Zeitunge aus Pennsilvaani naachgedruckt.
- Seh aa
Hochdeitsche Literatur im Berliner Journal
[Ennere | Quelltext bearbeiten]Mer finnt mannichmol aa Gedichte vum Henry Harbaugh do im Berliner, awwer aa sehr viel hochdeitsche Prosa un Gedichter, ass im Alte Land un in den Vereenichte Schtaate gschriwwe warre sin. Zum Beischpiel ebbes vum Ferdinand Freiligarth, vum Georg Herwegh, Otto Ruppius, odder vun der Annette von Droste-Hülsdorf. So, mer hot do in dem Blatt ghatt Deitschlenner-Literatur, deitsch-amerikanische Gedichte un nadierlich die vun die Ontario-Deitsche arrig geglichne pennsylvanisch-deitsch Brief un kaze Prosa-Schticker.
- Katharina Bärbel Bum, Die Sprache der Anzeigenwerbung im Berliner Journal: Eine Analyse ausgewählter Anzeigen von 1859-1918. Waterloo, Ont.: Universität vun Waterloo, 2004.
- Herbert Karl Kalbfleisch, The History of the Pioneer German Language Press of Ontario, Kanada. ( = STUDIEN ZUR PUBLIZISTIK; BREMER REIHE; BAND 11 ). London, Ontario, Kanadaa; Münster, Deitschland: Universität vun Wescht-Ontario; Verlag C.J. Fahle, 1968.
- Seh aa