Wollgraut

Vun Wikipedia
Wollgraut

Wollgraut waxt in verschtarrdem odder unfruchtbaarem Grund. Des Graut blieht ass en zweeyaahrich Blans. Sei Bledderwirbel un sei Schtengel sinn gross, hoch, dick, un wollich. Em Wollgraut sei Blumme sinn glee un gehl, un erzeige reichlich Saame vor. Mer kann die Bledder im erscht odder im zwett Yaahr sammle, awwer sell muss geduh sei, bevor der Schtengel im zwett Yaahr gedeht.

Wollgraut iss en Middel, ass Schleim leese duht. Es schtillt die Zucking un Huschde in die Lunge. Wann mer en Wollgrauttee mache will, muss mer Acht gewwe, die Bledder mit em Seihduch rauszuseihe. Die Bledder sinn aarick haarich, un sie kenne der Hals reize. Der Christopher Sauer empfehlt mit de Bledder en Blaschder mache, die Mieh zu schtille. Der Wollgrautessich soll aa Entzindung vermildre kenne, Hemmerhoiden schtille, un schmaertzliche Hautgranket dischdere. Wammer en Blaschder mache will, muss mer die Bledder in heesse Millich odder Wasser eiweeche losse, un dann warre die Bledder uff die Haut ausglegt. Wollgrautwatzel iss en wichdich Middel fer Graempf zu schtille. Hildegard vun Bingen hot der Wollgraut geyuust fer’s Halsweh, fer heeschde Schtimme un Lungeschmatz.

Deel alde Bauere losse Wollgraut newich ihre Heiser un Scheiere waxe. Sie glaawe, ass des Wollgraut deet der Blitz abwarne. Es Wollgraut iss en Verwaahringsgraut.

In alde Zeide henn viel Leit es im ’me Seckche gdraage fer Hexefluche zu breche. Am Marienheem (15 Augscht) waar es Wollgraut im Middelpunkt vun em Bundel mit nein verschiedliche Greider. Die annere sinn: Johannesgraut, Camillen, Dausendgildengraut, Wermut, Eisengraut, Balsem, Arnika, un Schoffrippe. Die Binnel sinn am Marienheem in die Kaerich mitgnumme un dann gesegnet warre. Seller Bundel iss in em Haus newwich em Haerd bhalde. Wann es en Blitz un Donner gewwe hot, sinn Schticke vun em Bundel ins Feier neigschmisse warre, en Verwaahring zu gewwe.

Gewebbgleecher[Ennere | Quelltext bearbeiten]

Commons: Wollgraut – Pikder, Videos unn/odder Audiofeils