Gezwitscher
Gezwitscher am Marriye,
Die Sunn iss schunn haus;
Nau, weck mit de Sarriye,
Die Veggel sin draus!
Sie singe so frehlich
En uraldes Lied;
Sin glicklich un seelich
Un warre net mied.
Un graad wie noch immer
Die Alde hen gsunge,
Net besser, net schlimmer,
So zwitschere die Yunge.
Die Veggelcher bringe
Uns Mensche Blessier;
Un Wann sie net singe,
Dann zwitschere mir.
Mir hen vun de Alde
En hallichi Schprooch;
Die welle mer halde
Mer zwitschere nooch.