Die Schlang un der Whiskey

Vun Wikipedia
Zur Navigation springen Zur Suche springen

Letschte Summer, wie ich am Rumdraewele waar in de differende Kaundis vun Pennsylvania, wu sie Deitsch schwetze, hawwich aardlich viel Schtories gheert. Deel vun denne Schtories deet mer "Tall Stories" heesse in Englisch. Do is eeni, as en Kall drunne in Pennsburg in Montgomery Kaundi, mir verzehlt hot. Er hot gsaat: "Ee Daag, wie ich an der Grick am Fische waar, hen die Fisch all mei Beet uffgfresse, un ich hab noch net heem welle, awwer ich hab nix ghatt, as ich yuse hab kenne fer Beet. Bletzlich hawwich awwer en gleeni Schlang genoticed, yuscht paar Fuss vum mer weck, un die Schlang hot en Grott im Maul ghatt. Sell hot mich aarick froh gemacht. Ich hab die Grott aus der Schlang ihre Maul genumme un hab sie uffgschnidde fer Beet. Ich hab awwer wennich sarri gfiehlt fer die aarm Schlang, weil ih 're ihre Middaagesse weckgenumme hab, un so, fer sie wennich bezahle fer mei Beet, hawwich 're en paar Drobbe Whiskey ins Maul gschitt. Die Schlang hot sich aagschickt, as wann sie zufridde waer, un sie is fatt gegraeddelt, un ich bin widder ans Fische. Awwer naachdem ich ebaut fimf Minudde am Fische waar, hawwich ebbes gfiehlt wedder mei Schtiwwel schlage, un wie ich nunner geguckt hab, datt waar die seem Schlang widder mit drei Grotte im Maul."

(Source: The Morning Call, 'S Pennsylfawnisch Deitsch Eck, Nov. 20, 1948)