Die Groossdaadi Grundsow Lodge

Uff September 28, 2005, sinn die Haaptmenner un Raadsleit vun die 17 Grundsei Lodsche im Eastern Pennsilfaani zammekumme fer's zwanzigscht Yaahr in Kutzeschtettel. Der Leroy Heffendrager un sei Buwe henn guud Musick gemacht. Die Grundsei waare hungerich fer esse, un der Carl Snyder hot die Lodsch uffgemacht am halwer siwwe. Der Parre Russell Heintzman hot schee gebeet, un die Buwe henn sich nei gelosst. Der Schreiwer, Richard Miller, hot die "Minutes" geleese vum Yaahr devor. Der Dr. William Donner vun die Kutztown University hot en Report gewwe vun sei Buch, ass er am schreiwe iss vun die Gschicht vun die Grundsei Lodsche. Der Carl Snyder un der Richard Miller henn gsaagt, ass des waert es letscht Yaahr ass Haaptmann un Schreiwer. Alliebber waar sorry fer sell zu heere. Die Buwe henn en guude Tschabb geduh un hatt gschafft fer alles zamme halte. Der Paul Kunkel un sei Schulmeeschters henn sex Schule am geh. Sie duhne en wunnerbaar Tschabb. Sie henn noht en Leckschen ghatt fer neie Raadsleit, un selli Leit sinn nau uff'm Board: Lee W. Haas (Haaptmann), Donald Reinert (Schreiwer) un Donald Breininger (Geldheewer). Alliebber hot "Ya" g'saagt - except der Haas, der Reinert un der Breininger. Do im neie Land sinn mir blendi alte deitsche Brieder am verliere. Die Mudderschprooch watt wennicher un wennicher unnich die Luthrische un Reformierte. Die erscht Grundsau Lodsch henn Pennsylvaanisch-Deitsche ans geh grickt im Yaahr 1933. Alleweil henn die unnerschiddliche Lodsche alliwwer in Pennsilfaani noch baut 6,000 Glieder - en latt wennicher wie sie ghadde henn Yaahre zerick.

Hiwwe wie Driwwe No. 1/2006