Der Dokder weess es bescht
Paar Woche zerick hot em Tschann Eschelmann sei Fraa gemeent, der Tschann waer am schtarewe, un sie hot gschickt fer der Dokder. Wie der Dokder kumme is, hot er der Tschann iwwerall geexemment, un noh hot er der Mary, em Tschann sei Fraa, ins Ohr gepischbert: "Mary, ich denk, der Tschann is am schtarewe." - Der Tschann hot awwer gheert, was der Dokder gsaat hot, un er hot sich uffghockt im Bett un hot gegrische: "Nee, ich bin verflammt net am schtarewe." - Noh hot die Mary gsaat: "Nau, Tschann, leg dich hie, der Dokder weess es bescht."