Daniel Miller

Der Daniel Miller war en Professor aus Pennsylvania Deutschland.

Er hat en Treatise geschriewe üwer den Yänkees ihre Prejudice un es "Dumb Dutch" Stereotype:

Wu find mer so fruchtbare un schöne Bauerei wie bei de Pennsylvanisch Deutsche? Ihre Bauereie in Ost Pennsylvanie sin der Garte vun der Welt. Wann mer in der Welt träwelt, kann mer üwerall an de Gebäuer sehne, wu selle Klaß Leut wohne. Sie verstehne gewiß, wie zu bauere.

Dehl Leut behaapte, die Pennsylvanisch Deutsche wäre hinner der Zeit. Is sell wohr? Sie hen die beste Bauereie un die beste un neueste Maschine, un sie gehne nei for gute Schule. ℑn ehner Hinsicht sin Dehl zu langsam- in Kerchesache. An Dehl Platz sin sie so ziemlich wo ihre Vorväter ware.

Dehl Leut mehne, die Pennsylvanisch Deutsche wäre net schmart, weil sie net so kniffisch un tricklisch sin wie Dehl Yänkees. Sie sin net so gut ufgepohst in de Tricks wu viel Raskels juhse, awer sell is net nothwennig. Sie sin deswege viel besser ab. Unser Leut konne gut afforde, ohne selle Gescheidheit zu duh, wu die Leut schlecht macht. Sie hen all genug Lerning for ehrlich un rechtschaffe zu sei.

Es is wunnerbar, daß Dehl Leut wu vun de Pennsylvanisch Deutsche herstamme, sich dawege schämme. Sie losse ihre Kinner net Pennsylvanisch deutsch schwätze oder lese, un verlegle es, daß sie deutsch Blut in sich hen. Gut Englisch konne sie net schwätze, un Deutsch wolle sie net schwätze. Is sell net dumm? Die Yänkees schicke ihre Kinner in deutsche Schule for die gut alt Sproch zu lerne, awer unser ehgene Leut welle sich schämme, deutsch zu sei.