Daniel Falckner

Vun Wikipedia
Zur Navigation springen Zur Suche springen

Der Daniel Falckner is gebore warre im Yaahr 1666 in Sachse / Deitschland. Geschtorwe is er ca. 1744 in Amerika.

Sei Vadder un aa schun sei Groos-Vadder waare all lutherische Parre gewese. Er hot in Erfurt / Thueringe Theologie schtudiert un is datt Aahenger vun dem deitsche Pietischde Hermann August Francke waare. Im Yaahr 1694 is er als Ageent vun der " Teutsche Landcompagie" nach Pennsilfaani gschickt waare um do Land fer deitsche Auswanderer zu suche.

Er is mit en Grubbe vun deitsche Myschdiker um den Johann Kelpius vun Rotterdam, iwwer London nach Pennsilfaani gfaahre ( die schpeedere "Eisiedler vum Wissahickon" ). Mer wisse net genaa, in welche Beziehung selle Auswanderer-Grubbe middem Falckner un der Frankfurter "Landcompagnie" gschtanne is. Der Falckner hot zwischezeidlich woll aa schtarricke myschdische Neigunge ghatt.

Vermudlich hot der Falckner awwer ball mit daere Gemeenschaft am Wissahickon gebroche. 1698 is er nach Deitschland zerrick kumme un hot dem Francke in eem gleene Buch Auskunft gewwe iwwer es Lewe in Pennsilfaani: "Curieuse Nachricht von Pennsylvania in Norden-America welche auf Begehren guter Freunde über vorgelegte 103 Fragen bei seiner Abreiß aus Teutschland nach obigem Lande Anno 1700 ertheiltet und nun Anno 1702 in den Druck gegeben worden".

Selle Schrift is awwer erscht 1702 in Deitschland nausgewwe waare. Vermudlich als Aahang vum Thomas Gabriel sei Bericht iwwer die Provintz Pennsilfaani vun 1702 in eem Frankfurter Verlag.

1700 is der Daniel mit seim Bruder, dem Justus Falckner , der aa Theologie schtudiert hot, nach Amerika zerrick gfaahre. Aa en gleene Auswanderer-Grubbe is mit ihne nach Pennsilfaani kumme. Die Leit sin woll urschpringlich aus Naad-Deitschland kumme. Sie hen sich all naadlich vun Filadelfi niederglosse, im heidige Nei-Hanover Taunschip, Montgomery Kaundi. Zu Ehre vun ihre Parre hen die Siedler selle Landschaft "Falckner´s Schwamm" ("Falckner´s Swamp") gheese. Sellewege is die erschde lutherische Gmee in Naad-Amerika aa datt entschtanne. Zum Prediger vun daere Gemeinde is der Daniel Falckner beschtimmt waare. 1708 is die Siedlung in groose Schwierigkeede kumme. Aus finantzielle Grind hot der Falckner es Land an dem Johann Spogell verkaafe misse. - Der Spogell war urschpringlich vun Holland odder vun Deitschland kumme. Druffhie hot der Spogell versucht die Siedler vun ihrne Land zu verdreiwe. Die Siedler vum Falckner´s Schwamm hen dann den Pastorius im Deitscheschteddel um Hilf aagschproche. Ball hot mer gemerkt, ass es all en beese Betriegerei gwese is, was der Spongell do gemacht hot. Awwer aeryedswie hot der Spongell es geschafft es Land in seim Besitz zu behalde. Als die groose Eiwanderungs-Welle aus Deitschland kumme is, hot der Spongell es Land fer viel Geld an annere deitsche Siedler weider verkaaft.

Schpeeder is der Falckner noch Parre in verschiedne deitsch-lutherische Gemeinde in Nei-Yarrick un in Nei-Schaersi gewese. Sei letschde Parrei in Nei-Schaersi hot er 1731 wege sei myschdische Neigunge verlore.

Lidderadur[Ennere | Quelltext bearbeiten]

Lischde mit enniche Lidderadur iwwer es Lewe un Wirke vum Daniel Falckner in Amerika:

  • Falckner, Daniel; Sachse, Julius Friedrich, Falckner's Curieuse Nachricht von Pensylvania ... A reprint of the edition of 1702, amplified with the text of the original manuscript in the Halle Archives. Together with an introduction and English translation of the complete work by J. F. Sachse. Philadelphia 1905.
  • Falckner, Daniel; Sachse, Julius Friedrich, A contribution to Pennsylvania history : missives to Rev. August Herman Francke from Daniel Falckner, Germantown, April 16, 1702 and Justus Falckner, New York, 1704 / supplemented with a genealogical chart of Daniel Falckner. Lancaster, Pa, 1909.
  • Falckner, Daniel, Sachse, Julius Friedrich, Daniel Falckner's Curieuse nachricht from Pennsylvania, the book that stimulated the great German immigration to Pennsylvania in the early years of the XVIII century; tr. and annotated by Julius Friedrich Sachse...Prepared at the request of the Pennsylvania-German society. Lancaster, Pa. 1905.