Aldi Fraa
Aldi Fraa odder Beifuss (Artemisia vulgaris) iss en Graut, ass eigebore zu Eirop un Aeschia iss. Heidesdaags iss die “Alt Fraa” aa alliwwer in die USA deheem. “Aldi Fraa” iss em Warmet sei Verwandter. Es iss awwer leicht zu erkenne, weil die “Alt Fraa” schpitze, silwer-weisse Bledder hot. Der Warmet im Vergleich, hot schtumpe un runde Bledder. Die “Alt Fraa” iss en bidder Graut, drum watt sie geyuust ass en Verdauungsmittel. ‘S waare gleene Dose iwwer en lange Zeit gedoktert. Uff die do Weis wetzt sie die Abbeditt un verschtaerrickt die Verdauung, un sie schteigert der Aagschtallt vun der Lewer. “Aldi Fraa” reggeliert der Fluss vum Gallblos, un so helft sie mit Naahring-Einemming, un ermuntert die Daermwaerm-Wegschaffing. Die “Alt Fraa” iss bidder, un doch find mer sie oft in eiropischer Schpeis; zum Beischpiel: Brotfillsel, Gnepp, feddichi Wascht, un gereeschti Gans. Nadierlich iss sie drin, weil sie mit der Verdauung so breet helft. Zu de alde Brauch iss “Aldi Fraa” aa en Weibsleit-Heilmittel un helft mit der unreine Zeit. Es ruhgt Grempe, helft mit die Kinnsnoot un aa mit der Noochgeburt-Wegschaffing. “Aldi Fraa” waar aa wie en Liniment, Salb oder Blaschder geeich die Gicht un Gliederschmatze geyuust. Im Heem iss “Aldi Fraa” in de Gleeder geschtellt waerre fer die Fleddermeis wegzuhalde. Sie iss aa in ‘s Haus un in die Scheier-Schparre gehenkt waerre, fer die Micke zerickzuschtosse. Iememeeschdere, wann sie in de Heifts gschafft ghatt henn, henn sich an de Hend mit verdrickte Bledder geriwwe, fer die Schtachle zu verhinnere. Die Pilyer henn die “Alt Fraa” in ihr Schuh gschtellt, fer die Miedichkeet zu hinnere. En Tee vun “Alder Fraa” iss aa wie en Fuussbaad fer miede Fiess un Bee gebraucht warre. Wann es in die Kisse eigschtoppt iss, helft die Alt Fraa mit Schloflossigkeet un Draame. Fer die Kinner sinn Kamille un “Aldi Fraa” zammegemischt warre. In der Braucherei watt “Aldi Fraa” noch geyuust. Der Braucher nutzt der Rauch vun “Alder Fraa”, fer en Haus naach en Grankheet odder en Doot zu reiniche.