Wilhelm Ritenhaus

Vun Wikipedia
Zur Navigation springen Zur Suche springen

Der Wilhelm Rittenhaus is gebore waare im Yaahr 1644 in Mülheim an der Ruhr / Deitschland in een mennonischde Familiye. Gschtorwe is er 1708 im Deitscheschteddel / Pennsilfaani am 18. Hanning.

1665 hot er in Holland die Gertrud Kersten Pieters gheiert. Vermudlich aa en mennonischde Maedel. Der Rittenhaus hot sich efders in Holland uffghalde: fer gschefdliche un fer religeese Grind, weil in Holland waar en grosse Mennonischde-Gmeeschaft. Er waar in Mülheim allweil en Papier-Mieller. Um 1678 is er endgiltig nach Holland (Arnheim) gange.

Er is 1687 vun datt mit sei Fraa un ihre Familiye nach Amerika uffgbroche. Zuerscht sin sie nach Nei-Yarrick gfaahre. Ihr Sohn, der Claus ("Nicolas") Rittenhausis zuerscht datt gebliewe un hot do gheiert. Sei Eldre sin iwwer Land nach Pennsilfaani weidergezoge un hen sich im Deitscheschteddel niederglosse un datt Land kaaft. Schpeeder is der Sohn mit sei neie Fraa nachkumme.

1690 hot der Rittenhaus an der Monshone-Kriek en Papier-Miehl-Gsellschaft gegrindt: sei Paertner waare der William Bradford (en englische Drucker), der Robert Turner un der Thomas Tresse. Es Wuhn-Haus newwe der Miel schteht heit noch immer.

Im Yaahr 1691 is der Rittenhaus mit sei Familiye naduralisiert waare.

Im Yaahr 1705 hot der Rittenhaus mit seim Sohn Nicholas sei englische Paertner auskaaft. So waare sie also alleeniche Eigediemer von daere Miehl beim Deischteschteddel.

Zu daere Zeide is der Rittenhaus aa der erschde Bischof vun der Mennonischde-Gemee vum Deitscheschteddel warre. Awwer die Bischeef in Eiropa sin gegen sei Waahl gewese un es hot kaz vor dem Wilhelm Rittenhaus sei Dod Schreit weger sellem gewwe. Es Versammlungshaus vun die Mennonischde waar bis zum Bau vun en eegne Gebei im Haus vum Jacob Isaac Van Bebber.

An der Geschicht vun der Rittenhaus-Familiye kann mer guud sehne, ass schun die erschde nieder-deitsche ("Plaut-dietsch"-Schwetzer) Mennonischde in Pennsilfaani mit ihrne ganse Familiye un viele Verwannde in der Neie Welt aakumme sin un sie allweil versucht hen zamme zu wunne. Es selwe Phaenomen sehnt mer aa bei die schpeedere Pfälzer-Gruppen un die Schweitzer Mennonischde.

Seh aa