John Stoltzfus

Vun Wikipedia
Zur Navigation springen Zur Suche springen

Der John A. Stoltzfus (1870-1957) waar en Bischof in der Weavertown Amish Mennonite Church. Er waar eens vun de Instigators vun de Peachey schplitt in Lengeschder Kaundi, Pennsilfaani. Die annere Leaders waare der Christian J. Beiler, der Christian L. King (1861-1950), Jacob Kauffman (1851-1911) unn der Eli Kauffman (1854-1925). Sie henn in 1909 gschterdt mit nanner aadreffe fer die Biwwel lese. Sie henn some Breddicher in Belleville, Pennsilfaani gfroogt fer sie helfe fer en Kaerich uffschterde. Sie henn der S. W. Peachey, der C. D. Peachey, unn der Bischof John P. Zook gfroogt fer helfe cause sie waare am schplidde aa vun de Amisch datt driwwe in Mifflin Kaundi, Pennsilfaani. Uff em 27 Henning in 1910 hot's erscht Versammling gewwe fer die nei Gmee. Es waar in em George W. Beiler sei Haus net weit vun Gordonville, Pennsilfaani. Die Breddicher S. W. Peachey unn J. P. Zook waare datt. Uff em 28 Abrill, 1911 war der John A. Stoltzfus eigsetzt Breddicher bei der Bischof John P. Zook. Der Christian L. King waar aa eigsetzt uff sellem Daag. Uff der 25 Abrill, 1926 waar er eigsetzt Bischof by der John B. Peachey ee Daag noch der Christian L. King. Epmols waar die Weavertown Amish Mennonite Church die John A. Gmee gheese. Iwwer sei Lewe hot er baut 200 Leit gedaaft unn er hot 64 Paare gheiert. Fimf Mol daerich sei Lewe hot er die zwee, die Kinner unn die Eldere gheiert (net zaame uff kors). Mer saagt ass er oftmols gsaagt hot : "I'd rather live in a log cabin in the woods where there is love than to live in a mansion without love." Er hot en latt Biwwel Verses by hart gekennt unn hot gegliche annere Beachy Gmeene bsuche. Fer baut ee Yaahr eb sei Dot hot er net in die Gmee geh kenne cause er zu grank waar. Er iss gschtaerewe in re Hoschpitaal noch re Operation.

Gwuelle[Ennere | Quelltext bearbeiten]

  • Ferne Eileen Lapp, History of Weavertown Church, 1963, gepublisched by die Anna Mary Yoder in Lengeschder Kaundi, Pennsilfaani.