Hiwwe wie Driwwe

Hiwwe wie Driwwe

Hiwwe wie Driwwe iss die pennsilfaanisch Deitsch Zeiding, wu rausgewwe watt beim "Private Archive of Pennsylvania German Literature" (Ober-Olm, Deitschland). Drucker un Editor iss der Michael Werner. Sitter 1997 warre zweemol im Yaahr 2,000 Kapies gedruckt un g'schickt zu all die Leser in Natt Amerikaa un im alte Land. Mer kann denke, ass "Hiwwe wie Driwwe" sellerweg baut 5,000 Leser im Yaahr hot. "Hiwwe wie Driwwe" schafft zamme mit 'em Pennsylvania German Cultural Heritage Center in Kutzeschtettel (Kutztown, PA). Sitter 2013 sinn Patrick Donmoyer un Amanda Jane Richardson Co-Editors vun die Zeiding.

Year Publisher Editor Co-Editors Notes 1997-2012 Dr. Michael Werner Dr. Michael Werner - Gedruckt in Föhren (Deitschland) sitter 2013 Dr. Michael Werner Dr. Michael Werner Patrick Donmoyer, Amanda Jane Richardson Gedruckt in Ephrata (PA) hiwwe-wie-driwwe.de Sitter 2002 iss hiwwe-wie-driwwe.de uff'm Weltweit Gewebb un waar's erscht Heemetblatt, ass ganz in die Mudderschprooch gschriwwe waar. Alleweil hot sell Heemetblatt baut 40,000 Bsucher im Yaahr. Mer kann datt en Mudderschprooch-Blog finne mit deitsche Schticker un aa Videos. Sitter 2007 iss en "Hiwwe wie Driwwe Pennsylvanisch-Deitsch Internet Class" mit 12 Lessons online (MP3 files), ass die deitsch Schulmeeschtern Alice Spayd gemacht hot abbadich fer sell Heemetblatt. Sitter 2013 gebt's aa en Pennsylvanisch Deitsch Video Class, ass der Douglas Madenford gemacht hot. Hiwwe wie Driwwe Bicher Sitter 2002 schafft "Hiwwe wie Driwwe" zamme mit der Publishing Kumpni Edition Tintenfass vum Dr. Walter Sauer, Neckarsteinach. In sellem Yaahr hot die Zeiding ihr Leser gfrogt fer en pennsylvanisch-deitsch Iwwersetzing vum hochdeitsch Kinnerbichli Der Struwwelpeter. Fimf Yaahr schpeeder, im Yaahr 2007, hot der Prof. Earl C. Haag aus Pennsylvani en wunnerbaar guuder Text gschickt, un der Walter Sauer hot en schee Bichli gedruckt mit Hilf vun die German-Pennsylvanian Association un em Verein für deutsche Kulturbeziehungen im Ausland. Hiwwe wie Driwwe hot widder gholfe, sell Bichli bekannt zu mache im alte un im neie Land. Im Yaahr 2012 hot Hiwwe wie Driwwe noch en Bichli rausgewwe zamme mit die Edition Tintenfass. Es Bichli heesst Es globbt beim Sammy in der Nacht (HwD Series No. 1). Meh Bichlin sette noch kumme. # Year Bichli Hiwwe wie Driwwe Series 1. 2010 Earl C. Haag: Der Schtruwwelpitter (Original: "Der Struwwelpeter", deutsch, 1845) 2. 2012 Michael Werner: Es globbt beim Sammy in der Nacht (Original: "Es klopft bei Wanja in der Nacht", deutsch, 1985) HwD Series No. 1 3. 2013 Walter Sauer: Es Haus, wu der Jack gebaut hot (Original: "The House that Jack built", english, 1853) HwD Series No. 2 Hiwwe wie Driwwe Award Sitter 2011 hot die Zeiding zamme mit der Förderkreis Mundarttage Bockenheim e.V. im alte un em Pennsylvania German Minor Program an die Kutztown University im neie Land en Award for Pennsylvania German Literature ("Hiwwe wie Driwwe Award") ans geh grickt. Seller Award watt ausgewwe vun die Jury beim Pfälzischer Mundartdichterwettstreit in Bockenheim immer im Oktower. # Year Winner 1. 2011 Richard Savidge (Hegins, PA): 'S iss Winder im Daal (Gedicht) 2. 2012 Kevin Sterner (Gilbertsville, PA): Middagesse in de Zwansicher (Gschicht) 3. 2013 N.N. Hiwwe wie Driwwe Events Unnich em Naame "Deutsch-Pennsylvanische Geschichte(n)" hot die glee Zeiding zamme mit em Auswanderermuseum Oberalben im alte Land en glee yaehrlich Versammling gschtaert. Gmeenerhand iss sell Event middes in Oktower: # Year Schwetzer 1. 2009 Dr. Michael Werner (Ober-Olm) 2. 2010 John Schmid (Berlin, OH) 3. 2011 Don Breininger (New Tripoli, PA) 4. 2012 Keith Brintzenhoff (Kutztown, PA) 5. 2013 Richard Miller (Topton, PA) Sitter 2012 gebt's gmeenerhand alle paar Munet en "Hiwwe wie Driwwe Online Versammling" mit Hilf vun "anymeeting.com". Eenich ebbes schunscht 2003 waar's Private Archive of Pennsylvania German Literature eens vun die Co-Founder vum Deutsch-Pennsylvanischer Arbeitskreis (German-Pennsylvanian Association) im alte Land. Der Drucker Michael Werner waar President vun sell Association zwischich 2003 un 2010. Im Yaahr 2008 hot "Hiwwe wie Driwwe" en pennsylvanisch-deitscher Sticker gedruckt. Uff sell schteht gschriwwe: "Mer schwetze noch die Mudderschprooch". Gewebbgleecher hiwwe-wie-driwwe.de iss 's Heemetblatt vun die pennsylvanisch-deitsch Zeiding Hiwwe wie Driwwe im weltweit Gewebb.