Essenheim

Vun Wikipedia
Gang nooch: Faahre-Gnepp, guck uff

Essenheim iss en Schtettel, ass zur Palz gheert hot bis 1815. Noht iss es en Deel vun Hesse warre. Sitter 1946 iss es en Deel vum Schteet Rhoiland-Palz. Aus sellem Schtettel iss die Eva Krämer kumme. Sie hot‘s Schtettel Essenheim, ass neegscht zu Meenz gelege iss, verlosse im Yaahr 1731. Uff em Schiff „Pennsylvania Merchant“ iss sie ins neie Land kumme zamme mit ihr Paep Johann Adam Krämer, ihr Memm Maria Elisabetha (née Wolf), zwee Schweschdre un en Bruder. Sie henn gseddelt am Kreutz Grick in Yarick Kaundi in Hellam Taunschip. Ihr Name iss verleicht net guud bekannt in Pennsilfaani, awwer sie iss die Gross-Gremmem vun die pennsylvaanisch-deitsche Schreiwer Rachel Bahn un Henry Lee Fisher un die Gross-Gross-Gremmem vum Henry Harbaugh.

In die Yaahre bis 1776 henn baut 20 % vun die Leit in Essenheim ihr Heemet verlosse un sinn nach America gezoge - Leit mit Name Krämer, Wolf, Kron, Dechen, Pfundheller, Daron, Lies, Schreiber, Schultz, Stern, Fissel, Schmitt, Scheib, Paulus, Degen, Schmahl, Schnorr, Klein, Wagner, Hess, Feldmann, Schminck, Sandmüller, Spiess, Schreiber, Kletter, Beckel, Meckel un Bender. 120 Leit vun der Blatz henn ihr Heemet verlosse in baut 45 Yaahr. Die meenschte vun ihne henn gseddelt am Kreutz Grick. Deel henn der Weg en wennich verennert, wie sie ihr Name schpelle - „Small“ inschtatts vun „Schmahl“, „Fishel“ inschtatts vun „Fissel“, „Cramer“ inschtatts vun „Krämer“. Stefan Mossel aus ‘m Schtettel Essenheim kennt all die Name vun die Leit, ass naach America gezogge sinn, un aa Freindschaft vun selli Leit, ass heit noch in Deitschland lebt.

Alleweil iss er am schaffe mit die „Kreutz Creek Valley Preservation Society“ fer wennich meh ausfinne iwwer die Auswannerer aus Essenheim un deet gleiche in Contact kumme mit Yarick Kaundi Deitsche, ass verleicht Naachkumme sinn vun selli Leit. Der Stefan Mossel iss aa en Glied vun die „Deutsch-Pennsylvanischer Arbeitskreis“ (German-Pennsylvanian Association). Im September 2007 hot selli Society ihr yaehrlich „German-Pennsylvanian Day“ ghatt in Essenheim. Baut 80 Leit waare datt gwesst un henn wennich meh glannt iwwer die Pennsylvaanisch-Deitsche, ihr Schprooch un ihre Gebreiche.

Commons: Essenheim – Pikder, Videos unn/odder Audiofeils